“Эс Ай Си Эй” (SICA) ХХК нь Дэлхийн банкны санхүүжилтээр хэрэгжиж буй “Мал аж ахуйн эдийн засгийн эргэлтийг нэмэгдүүлэх” төслийн хүрээнд “Болзошгүй онцгой нөхцөл, гамшгийн үед хариу арга хэмжээ авах бүрэлдэхүүн хэсгийн үйл ажиллагаанд хөндлөнгийн үнэлгээ хийх” зөвлөх үйлчилгээг 2021 оны 3-6 дугаар саруудад  хийж гүйцэтгэлээ. Хөндлөнгийн үнэлгээ нь болзошгүй онцгой нөхцөл, гамшгийн үед авах үйл ажиллагаанд хяналт тавих замаар хариу арга хэмжээг сайжруулах, цаашдын тогтвортой үйл ажиллагааг хангахад шаардлагатай санал, зөвлөмжийг боловсруулах зорилгоор (i) суурь судалгаа, (ii) дунд шатны үнэлгээ болон (iii) эцсийн шатны үнэлгээг хийсэн болно. Суурь судалгааг 2021 оны 3 дугаар сард зохион байгуулсан бөгөөд “Малчдад хүргэх тэжээлийн тусламж” төсөлд хамрагдсан Баянхонгор, Говь-Алтай, Дундговь, Өвөрхангай болон Өмнөговь аймгийн 5 аймгийн 599 малчин өрхийг судалгаанд хамруулан үр дүнг боловсруулсан. Дунд шатны үнэлгээг 2021 оны 2-4 сард зохион байгуулж Улаанбаатар хотод тэжээл үйлдвэрлэж буй 5 үйлдвэр болох “Түмэн шувуут” ХК-ийн “Агро фийд” үйлдвэр, “Баялаг фийд” ХХК, “Гурван Уул трейд” ХХК, “Ийст вест трейд” ХХК болон “ЧМТО” ХХК-д, орон нутгийн 5 аймаг 20 сумын тэжээлийн үйлдвэрлэл, тээвэрлэлт, хуваарилалтын үйл ажиллагаанд хяналт хийж, санал зөвлөмжийг хүргүүлсэн. Эцсийн шатны үнэлгээг 2021 оны 5-6 сард хийж гүйцэтгэсэн бөгөөд суурь судалгаанд хамруулсан 599 малчин өрхөөс тоон судалгааг авч, “Малчдад хүргэх тэжээлийн тусламж” төслийг хэрэгжүүлж буй аймаг, сумын 15 мэргэжилтнийг ганцаарчилсан ярилцлагад хамруулан үр дүнг нэгтгэн тайлагнасан.

Бид бүхэн “Мастер түншлэл” ХХК-ийн захиалгаар “Бизнес эрхлэгчдийн зан төлөв, хэрэгцээ шаардлагыг тодорхойлох судалгаа”-г амжилттай гүйцэтгэлээ. Судалгаанд УБ хотод үйл ажиллагаа явуулж буй 17 төрлийн худалдааны чиглэл, 14 төрлийн үйлчилгээний чиглэлийн бизнес эрхлэгчид хамрагдсан. Бизнес эрхлэгчдээс шинээр барих гэж буй худалдаа, үйлчилгээний төвийн концептийн тест, хүсэж буй ХҮТ-ийн бүтэц, зохион байгуулалт, ХҮТ-д тавигдах тусгай деталь шаардлага, техник үзүүлэлт мөн 1 м.кв-ыг худалдан авах, түрээслэх боломжтой дээд, доод үнийг тус тус тодруулсан. Судалгаанд хамрагдсан бизнес эрхлэгч бүрд ХҮТ-ийн концептийг танилцуулж, тусгай бэлтгэсэн асуултуудаар тест хийсэн ба тэдний худалдан авах, түрээслэхээр сонирхож буй талбайн хэмжээ, байршлуудыг үнийн мэдрэмжээс нь хамааруулан эрэлт, хэрэгцээг нь тодорхойлсон. Ингэснээр зах зээл дээрх талбайн болон байршлын эрэлт, түүнд төлж чадах үнэ мөн ХҮТ-д тавьж буй шаардлагуудыг нарийвчлан тодорхойллоо. Судалгаанд үндэслэн шийдвэр гаргахыг эрхэмлэсээр ирсэн “Мастер түншлэл” ХХК-ийн хамт олонд ажлын өндөр амжилт хүсье.

Манай компани “Ардчиллын боловсрол төв” ТББ-ын захиалгаар “Иргэний орон зайн төлөв байдал, түүнийг дэмжих эрх зүйн таатай орчны хэрэгцээ шаардлагыг тодорхойлох” судалгааг гүйцэтгэсэн. ИНБ (Иргэний нийгмийн байгууллага)–ын эрх зүйн орчныг боловсронгуй болгох, сайжруулахтай холбоотой нөлөөллийн үйл ажиллагааг баримт, дүн шинжилгээ бүхий мэдээллээр хангах үндсэн зорилгоос гадна ИНБ-ын үйл ажиллагаа болон оролцогч талуудын зураглалыг тодорхойлох, ИНБ-ын үйл ажиллагааны үр нөлөө болон Монгол Улс дахь иргэний орон зайн өнөөгийн төлөв байдлыг судлах зорилтуудыг агуулсан болно. Тус судалгаанд Улаанбаатар хот, 21 аймагт идэвхтэй үйл ажиллагаа явуулж буй 683 ИНБ, төрийн болон ОУ-ын байгууллага, хэвлэл мэдээллүүдийн төлөөллүүдтэй бүлгийн ярилцлагыг хийж, олон талын байр суурь, мэдээллийг нэгтгэхийг зорив. Бид судалгаанд оролцогчдын байгууллагын үйл ажиллагааны чиглэлийг НҮБ-ын дэргэдэх статистикийн хорооны боловсруулж, гишүүн орнуудад ашигладаг COPNI2019 загвараар ангилсан ба оролцогч байгууллагыг нийгэмд үйлчилдэг, гишүүддээ үйлчилдэг гэхээс гадна аль алинд нь гэх ангиллыг нэмж харьцуулалт хийхэд ашигласан.  Энэхүү судалгааны тайлан нь манай байгууллагын ДАТАМОН платформд нээлттэй байршсан бөгөөд та дэлгэрэнгүй тайлантай танилцах бүрэн боломжтой. “Ардчиллын боловсрол төв” ТББ-ын ажилсаг, оюунлаг хамт олондоо маш их баярлалаа, цаашдын ажилд нь өндрөөс өндөр амжилт хүсье.

Бид бүхэн “Мастер түншлэл” ХХК-ийн захиалгаар “Худалдаа, үйлчилгээний төвийн талбайн баталгаажуулах судалгаа”-г зорилтот 2 бүсийн хүрээнд амжилттай гүйцэтгэлээ. Судалгааг тоон, чанарын мөн тооллогын аргуудаар гүйцэтгэсэн бөгөөд зорилтот бүсийн иргэд, оршин суугчид, бизнес эрхлэгчдээр концептийн бүтээгдэхүүн үйлчилгээг тестлүүлэх, өрхийн зан төлөвийг судлах, бүсийн худалдаа, үйлчилгээний цэг, хүний болон автомашины урсгалын тооллогыг гүйцэтгэх, худалдаа, үйлчилгээний талбайн реалторуудтай ярилцах замаар төслийн концепцийг баталгаажуулах, дүгнэлт, зөвлөмж өгөхөд энэхүү судалгааны зорилго оршино. Шинээр баригдах гэж буй худалдаа, үйлчилгээний төвийн концептийг судалгаанд хамрагдсан хүн бүрд танилцуулж, бэлтгэсэн тусгай асуултуудыг асуух замаар тест хийсэн ба оролцогчдын зан төлөвийг юуг?, хэдээр?, хаанаас? Ямар давтамжтайгаар? Хэнтэй? Гэсэн асуултуудаар шинжилж (7O/7C шинжилгээ) тодорхойллоо. Судалгаагаар зорилтот бүсийн иргэдэд тус худалдаа, үйлчилгээний төв таалагдаж байгаа эсэх, үйлчилгээ авах эсэх, бусдаас ялгаралтай байж чадаж байгаа эсэх зэрэг асуудлуудыг тодорхойлохоос гадна өрхүүдийн бүсээсээ хангаж байгаа болон хангагдахгүй байгаа хэрэгцээнүүдийг илрүүлсэн. Ингэснээр концептоо дахин сайжруулах, ямар бүтээгдэхүүн, үйлчилгээг тус бүсэд нийлүүлэх шаардлагатай байгаа зэрэг худалдаа, үйлчилгээний төв амжилттай хэрэгжих чухал мэдээллүүдээр хангаж өгсөндөө баяртай байна. Судалгаанд үндэслэн шийдвэр гаргахыг эрхэмлэсээр ирсэн “Мастер түншлэл” ХХК-ийн хамт олонд ажлын өндөр амжилт хүсье.

Бид БНСУ-ын ЭСЯ-ны харьяа КТО Улаанбаатар төлөөлөгчийн газрын захиалгаар “БНСУ-ын аялал жуулчлалын талаарх судалгаа”-г амжилттай гүйцэтгэлээ. Энэхүү судалгааны гол зорилго нь БНСУ-ын аялал жуулчлалын талаарх мэдээллийн хүртээмжтэй байдлыг нэмэгдүүлэх, цаашид Солонгос Улсад чиглэлтэй Монгол аялагчдад зориулсан аялал жуулчлалын бүтээгдэхүүнийг хөгжүүлэхэд оршсон. Судалгаанд Улаанбаатар хот болоод бүсийн төлөөлөл болох 4 аймгийг хамарсан 20-иос дээш насны гадаад аяллын туршлага бүхий иргэдийг хамруулсан. Уг хүрээнд иргэдийн БНСУ-ын аялал жуулчлалын талаарх мэдлэг хандлага, судалгаанд хамрагдагчдын аяллын туршлага, БНСУ-д чиглэлтэй аяллын бүтээгдэхүүний тухай, мэдээлэл авдаг эх сурвалж, аялах хүсэлтэй бүс нутаг, газар, үзвэр үйлчилгээ зэрэг байгууллагын зүгээс шийдвэр гаргахад шаардлагатай чухал мэдээллүүдийг цуглуулж, үнэлэлт, дүгнэлт өгсөн. Судалгаанд суурилсан үр дүнг эрхэмлэн хамтран ажлласан КТО Улаанбаатар төлөөлөгчийн газрын хамт олонд ажлын өндөр амжилт хүсье.

Бид бүхэн “Мастер түншлэл” ХХК-ийн захиалгаар  “Худалдаа, үйлчилгээний бизнес эрхлэгчдийн худалдаа, үйлчилгээний талбай худалдан авах болон түрээслэх эрэлтийн судалгаа”-г амжилттай гүйцэтгэлээ. Судалгааг тоон судалгааны аргаар гүйцэтгэсэн бөгөөд худалдаа, үйлчилгээний бизнес эрхлэгчдээс одоогийн талбайдаа үйл ажиллагаа явуулж буй хугацаа, талбайн түрээсэнд дунджаар зарцуулдаг мөнгөн дүн, талбайгаа солих болон өргөжүүлэх сонирхол байгаа эсэх, хэрэв тийм бол аль байршлыг илүүтэй сонирхдог зэрэг асуудлуудыг тодруулах замаар бизнес эрхлэгчдийн худалдаа, үйлчилгээний талбайн худалдан авах болон түрээслэх эрэлтийг тодорхойлсон юм. Мөн эрэлтийг тодорхойлохын сацуу тодорхой нэгж болон бүлэг үзүүлэлтүүдээр бизнес эрхлэгчдийн үйл ажиллагаа явуулж буй худалдаа, үйлчилгээний төв дэх сэтгэл ханамж, ач холбогдлын шинжилгээ (GAP analysis), үнэнч байдлын шинжилгээ, сэтгэл ханамжийг удирдагч хүчин зүйлсийн шинжилгээ, Net promote score, үнэнч хэрэглэгчийн шинжилгээ (loyalty matrix) зэрэг шинжилгээнүүдийг гүйцэтгэсэн нь ихээхэн давуу талтай болж өгсөн юм. Шинжилгээгээр худалдаа үйлчилгээний талбайн аль үзүүлэлтүүд дээр анхаарах шаардлагатай, аль үзүүлэлтүүдийг хэвээр үлдээх шаардлагатай, хэчнээн хувь нь одоогийн талбайгаа солих бодолгүй байгаа зэрэг дүгнэлтүүдийг гаргаж ирсэн бөгөөд цаашид төслийн концепцыг тодорхойлоход шаардлагатай маш чухал суурь мэдээлэл болж өгсөн юм. Судалгааны бүхий л үе шатанд хамтын ажиллагааг эрхэмлэн ажилладаг “Мастер түншлэл” ХХК-ийн хамт олонд талархал илэрхийлье.

Бид УУХҮЯ-ны захиалгаар “Уул уурхай, хүнд үйлдвэрийн яамны хэрэглэгчийн үнэлгээ”-г амжилттай гүйцэтгэлээ. Энэхүү судалгааны гол зорилго нь Уул уурхай, хүнд үйлдвэрийн сайдын эрхлэх асуудлын хүрээний төрийн захиргааны төв байгууллагаас хэрэгжүүлж байгаа төрийн бодлого, зохицуулалт, тэдгээрийн хэрэгжилтийн үр дүн, иргэдэд үзүүлж буй ажил, үйлчилгээний талаарх хэрэглэгчийн сэтгэл ханамжийг судлахад оршсон бөгөөд УУХҮ-ийн сайдын эрхлэх асуудлын хүрээний бодлого, хууль тогтоомж, тогтоол шийдвэр, хөтөлбөр, үйл ажиллагааны үр дүн, үр нөлөөг шууд хүртэгч Нийслэл дэх хуулийн этгээдийн ажилтнууд, болон мэргэжлийн төрийн бус байгууллага, иргэний нийгмийн байгууллага, иргэдийн төлөөллийг судалгаанд хамруулсан. Судалгааны үндсэн зорилгын хүрээнд дараах зорилтуудыг дэвшүүлэн ажилласан. Үүнд: Иргэдийн үйлчилгээнд өгч буй сэтгэл ханамжийг тодорхойлох, Үйлчилгээ авахад иргэдэд тулгамдаж буй асуудлыг судлах, Судалгааны үр дүнд үндэслэн үйлчилгээний чанар, хүртээмжид дүгнэлт өгөх. Хэрэглэгчийн сэтгэл ханамжийн үнэлгээг Уул уурхай, хүнд үйлдвэрийн яамны үйл ажиллагаа, үйлчилгээний чанар, хүртээмж, албан хаагчдын мэдлэг, ур чадвар, харилцааг зэрэг 8 бүлэг асуултаар Лайкертын хэмжүүрийн утгыг ашиглан авсан. Салбарын хүрээнд хэрэгжүүлж буй үйл ажиллагаа, түүний хүртээмжийг сайжруулах хүрээнд хэрэглэгчийн үнэлгээг гүйцэтгүүлэн хамтран ажлласан Уул уурхай, хүнд үйлдвэрийн яамны холбогдох мэргэжилтэн, алба хаагчдад ажлын өндөр амжилт хүсье.

Дэлхийн Зөн Монгол ОУБ нь НҮБ-ийн Гамшгийн эрсдэлийг бууруулах газраас санаачилсан “Гамшигт тэсвэртэй хотуудыг бий болгоё” санаачилгын хүрээнд хот, суурин газрын гамшгийн эрсдэлийг бууруулах, гамшгийн менежментийг сайжруулах, даван туулах чадавхыг бэхжүүлж, “Гамшгийн эрсдэлийг олон нийтийн оролцоотой бууруулах” үндэсний хөтөлбөрт хувь нэмэр оруулах зорилгоор “Гамшигт тэсвэртэй хотууд” төслийг 2018-2020 онд хэрэгжүүлсэн байна. “Эс Ай Си Эй” ХХК нь 2020 оны 8-9 дүгээр сард энэхүү төслийн төгсгөлийн үнэлгээг гүйцэтгэлээ. Үнэлгээ нь төсөл хэрэгжсэн газрууд болох Улаанбаатар хотын Багануур, Багахангай, Баянзүрх, Баянгол, Налайх, Хан-Уул, Чингэлтэй, Сүхбаатар, Сонгинохайрхан дүүрэг болон Орхон аймгийн Эрдэнэ, Уртын гол, Даваат, Говил, Цагаанчулуут, Яргуйт багуудыг хамарсан ба манай компанийн баг бүрэлдэхүүн байршил бүрд хүрч ажилласан. Үнэлгээний ажилд тоон болон чанарын судалгааны аргыг ашигласан ба төслийн үр шимийг хүртэгчдийн төлөөлөл болох 751 иргэн, багуудын засаг дарга, ОБЕГ, НЗДТГ, НОБГ, дүүргүүдийн Онцгой байдлын хэлтэс, Орхон аймгийн ОБГ, ЭМГ, ГБХЗХГ, БСУГ-ын ажилчид хамрагдсан юм.   Төслийн төгсгөлийн шатны үнэлгээний үр дүнд үр шим хүртэгчдийн гамшгийн үеийн бэлэн байдлын чадавх нэмэгдсэн, олон нийтийн мэдлэг, ойлголт болон гамшиг, аюулт үзэгдлийг даван туулах чадвар сайжирч уг төсөл нь зорилго, зорилтдоо хүрсэн бөгөөд бид цаашид анхаарах асуудал бүхий санал, зөвлөмжийг тусгаж тайланг захиалагч талд амжилттай хүлээлгэн өглөө.

Судалгаа, зөвлөх үйлчилгээний “Эс Ай Си Эй” ХХК, Санхүүгийн зах зээлийн холбоо ТББ-тай хамтран Монголд анх удаа “Монголын нийгмийн үеийг тодорхойлох судалгаа”-г хийж гүйцэтгэлээ. Судалгааны үр дүнд үндэслэн Монголын нийгмийн үечлэлийг дараах 4 бүлэгт хувааж байна. Үүнд: СОЦИАЛИСТ ҮЕИЙНХЭН /1964 оныг хүртэл/, ЗАВСРЫН ҮЕИЙНХЭН /1965-1982 оны хооронд/, ШИЛЖИЛТИЙН ҮЕИЙНХЭН /1983-1994 оны хооронд/, ШИНЭ ҮЕИЙНХЭН /1995 оноос хойш/. Монголын залуу үе Америкийн Z үеийнхнээс тэс өөр гэдгийг судалгаандаа онцолж байна. Бизнесийн байгууллагууд, судлаачид, төрийн бодлого боловсруулагч, боловсролын салбарын мэргэжилтнүүд болон олон нийтэд зориулан энэхүү судалгаагаа үнэгүй байршуулж байна. Та бүхэн судалгааг https://www.datamon.mn/ платформоос үнэгүй татаж аваарай.